Christianity : அழைப்பு

Image result for jesus calling you
செல் !
ஆபிரகாமுக்கு வந்தது
அழைப்பு !

ஊர் எனும் ஊரை விட்டார்.
குவித்து வைத்த‌
செல்வத்தையெல்லாம்
குதிகாலால் ஒதுக்கினார்.

ஏன் ?
எதற்கு ?
எப்படி ?
ஆபிரகாம் கேட்கவில்லை.
மாலுமியாய்
கடவுள் வந்தால்
வரைபடங்கள் தேவையில்லை.

ஒற்றை விதையிலிருந்து
மானுடத்தை
மலர வைத்தார் இறைவன்.

மோசே !

தார்மீகக் கோபத்தால்
எகிப்தியனை எதிர்த்தார்.
கொலை எனும் உலையில்
சிக்கி
அச்சத்தை அணிந்தார்.

உயிரை
சுருக்குப் பையில் சுருட்டி
பயத்தின் பதுங்கு குழிகளில்
பதுங்கியே வாழ்ந்தார்.

செருப்பைக் கழற்றென‌
நெருப்பு பேசியது.
அழைப்பு
அனலாய் வந்தது !

தயக்கத்தின் தடை தாண்டி
பிழைப்புக்காய் உழைப்பதை
விட்டு,
அழைப்புக்காய் உழைக்க‌
ஆயத்தமானார்.

ஒற்றை
விதையிலிருந்து
விடுதலையை புரிய வைத்தார்
இறைவன்.

என் பின்னே வாருங்கள்.
மீனோடு வாழ்ந்தவர்களை
வானோடு வாழ்ந்தவர் அழைத்தார்.

நீரோடும் மீன்பிடித்தது
போதும்
மனதோடு மனிதரைப் பிடிப்போம்.
என்றார்.

அவர்கள்
வலை வாழ்வை விட்டனர்
நிலை வாழ்வைப் பெற்றனர்.

ந‌ம்
இதயக் கதவுகளில்
அழைப்பு மணி ஒலிக்கிறதா ?

செவி கொடுப்போம்
வழி நடப்போம்.

அழைப்பு என்பது
அல்லலின் அலைகளில்
அலையும் அனுபவமல்ல.

எல்லாம் வல்ல‌
இறைவனின் தோளில்
அமரும் அனுபவம்.

*

 

One thought on “Christianity : அழைப்பு

  1. Gunasekar says:

    So Nice Bro.God bless You.

Leave a Reply

Your email address will not be published. Required fields are marked *