என் வாகனப் பயணம்

 

30-tree-paintings.preview

சென்னையில்
இரு சக்கர வாகனம் ஓட்ட
இரும்பு இதயம்
வேண்டும் போலிருக்கிறது.

என்
பழகமில்லாப் பயணத்தில்
வண்டிக் கண்ணாடியை
உரசி நகர்கின்றன
ந(த)கரப் பேருந்துகள்.

பச்சை விளக்கு
பல் காட்டியபின்,
மைக்ரோ வினாடியில்
வாகனம் பாய்ந்தாக வேண்டும்,

வழுக்குப் பாறைகளிடையே
விரால் மீன் பிடிப்பதாய்
கவனம் தேவை
கால்களிலும், கைகளிலும்.

இல்லையேல்
கட்சிமாறும் அரசியல் வாதியாய்
முன்னெச்சரிக்கையின்றி
முகம் திருப்பிக் கொள்ளும்
ஆட்டோக்கள்
மூர்க்கத்தனமாய் முத்தமிடும்.

பேருந்தின்
நசுக்கும் பயணமும்,
ஆட்டோ மீட்டரின்
பொசுக்கும் பணமும் தான்
என்னை இதில்
இறுக்கமாய் இருத்தியிருக்கின்றன.

இத்தனை நாள் பயணத்தில்
ஒன்று மட்டும்
கற்றுக் கொண்டேன்,

தவறு செய்வது யாரானாலும்.
முதலில் கத்துவோனே
வெற்றி பெறுவான்.

Leave a Reply

Your email address will not be published. Required fields are marked *